Türkiyə yığmasının baş məşqçisi Qus Hiddink yeni vəzifədə ilk tapşırığını verib. Hollandiyalı çalışdırıcı köməkçiləri Oğuz Çətin və Engin İpekoğlunun xarici ölkələrə ezamiyyətə yollanmasını əmr edib. Beləliklə, Oğuz Çətin dünən Avroliqanın 1/8 final mərhələsinin cavab qarşılaşmasında “Volfsburq” - “Rubin” matçını izləyib. Türk çalışdırıcı qonaqların heyətində forma geyinən həmvətənləri Gökdəniz Karadəniz, Fatih Təkkə və Hasan Kabzenin oyunlarına diqqət göstərəcək. Daha sonra Oğuz Almaniyanın digər şəhəri Frayburqa gedərək, martın 20-də eyniadlı komandanın “Maynts”la görüşünə baxacaq. Yığmanın məşqçisi “Frayburq”un 21 yaşlı türk müdafiəçisi Ömer Torpakı diqqət mərkəzində saxlayacaq. Engin İpekoğlu isə martın 20-də Hamit və Halil Altıntop qardaşlarının bir-birlərinə rəqib olacaqları “Ayntraxt” - “Bavariya” görüşünə baxacaq.

Qeyd edək ki, Türkiyə və Azərbaycan yığmaları Avro-2012-nin seçmə qrup mərhələsində bir-birə rəqibdir. Qardaş ölkənin komandası bu il oktyabrın 12-də Bakıya təşrif buyuracaq.